Acts 5

1Amma ozaho ɓo nyi ai yi wo ge Hananiya, owo nyikwo Safiratu. Wo ɓ o la owo ʼkni kun ce. 2Ɓa kni agyiwye ɓa ɓe n cei ngye nya ɓa kun nu.

3Amma Bitrus wa gna wo, “Hananiya, Shetan la nu ho bugba har hoi ce akata fi Zafun Gyi-gyi-yi. 4Ofwa oho nya nu ho ɓei n dama yi ha kun, ko kwa to ha kun m. Esa hola kun agyiwye zhin ho nya nu ha ga kwo shi ho ye. Kni a zhin hoi zhin nlaiʼa?”

5Hananiya n wo-woyi lo nu wa miya wa fi. Edna kwa wo azaho-zahoi. 6A samari ɓa ku aje puwo ɓa lo ɓa wo bi.

7Esa fyewyi owo nyikwo wa lo ɓe, to woi kpe enya nkwo ku zhin m. 8Bitrus wa nya wo ɓo. “Fya kun ofwa na gyiwyei layi nu?” Wa ye ge “Eh”.

9Bitrus wa gna wo, “Kni yi a zhin oho n ho ɓai fyei zhin shiri deye, fya mwi Shekwoyi zafun ko? Aza n ɓa bi oho ɓa nyi ɓa ɓe nyi ɓakaho bi.”

10N sayi-sayi wa fi. A samari ɓa ɓe ɓa wo lafi ɓa lawo ɓa biwo vivi nwo ɓai. 11Edna kwa wo ikklisiya vinya, du aza yi n ɓa ɓo ku ce wo.

12Abara ɓa gyi abye dna Solomon ashiragyi, n yezhi cici ɓai zhin aɓo wo-woyi n mwa. 13Azadoho to ɓei lo da ɓam, ama aza ɓei zhin ɓai gye ɓa mwa-mwa. 14Aza n mwa begye ɓa ga gaiciya anugbayi du na nyikwoza yi. 15A nyasan yi mwa begye, aɓe n ɓai nbmi ntuge Bitrus ofun kwa to ɓa, ɓa gwo kagna. 16Aza ɓa kun n Urushelima a kauye, ɓa ɓe nna nyasan yi du nna za yi nɓa ɓei n alijenu yi, a ɓa ka gna vinya.

Aku Atnu-tnuyi Je Wan

17Amma pirist dnagmayi n asadukiyi ɓa wo she ntu atnu-tnu manayi ɓo. 18Ba wan abara ɓa fi ɓa n kurkuku.

19Amma nsukwoyi Malaika ɓe wa gu ɓa abaya ɓa kun. Wa gna ɓa ge. 20“Fye lo aduwa nyakun fye zhin waʼazi wye-wyei nya.”

21N labmi yi, ɓa lo aduwa nyakun ɓa zhin waʼazi. Amma pirist dnagmayi n wo atukoda aje yi, ɓa ye zhi na shaula zhinyi. Ɓa yi abara ɓe cei. 22Dan-sanda wa lo kurkuku to wa gye ɓa fi m. Ɓa lo ɓa da atukwoda nya ɓa gye. 23“Kurkuku abokunmi ɓo guguyi aza n ɓa gu aba nyi n zhi, amma esa ya guya, yi to gye zaho-zahoi n dna m.”

24Ce awo ɓa vinya, to ɓa kpe nya nɓa ɓa zhin. 25Ozaho wa ɓe wa da ge ai aza nfye zanshi nyi, ɓa fi nu n aduwa nyakun ɓai zhin waʼazi.

26– 27Yan-sanda tukwoda, ɓa lo ɓa wan abara, ɓai zhin ɓa peceye, ntuge ɓa ɓo wo aza dna. Har ɓa ɓe n ɓai n ashaula zhinyi aba.

28Pirist dnaygmayi wa nya ɓa ge, “Kni a zhin to fyei vi eyi wyidna ma? Yi ku gna fye ge fye to je waʼazi zhin. Amma Urushelima la nu n fye wu-wu yi. Fye ye a gye eyi laifi nu dna oza deye fi ko?” 29Bitrus wa gna ɓa ge, “Yi vi Shekwoyi ɓeda nu ndu oza nya. 30Fye ɓo la esu gyi to nshiwan, fya wo wu. Amma Shekwoyi eyi azakwoyi nya ɓo la wo laka evingwo. 31Shekwoyi lawo ze yerima ɓedo n gniyi. Wa zhin ce lo nu ntu ge a Israilayi ɓa ya bui, a zhin ɓa laifi gafara. 32Eyihin ɓedo n Zafun Gyi-gyi-yi n Shekwoyi ga zaho-zahoi n ya, yi zhin aseda da nu.”

33Shi a shaula zhin yi ɓo wo lonu, ɓa gyi minagyi har ɓa ye ɓa wu ɓa. 34Amma Gamaliel wa da ɓo ge, “A la abara kun ya zhin n bmi kpa.” Gamaliel ɓo zhin ilimi da nu. Aza mwa ɓai kpe lonu.

35Wa gna wo azaje ge, “A Israilayi fye zhin peceiye enya yi nfye ye fya zhin aza ye nyi. 36Fye ku ze amui enya Theudas ɓo zhin? Wo ɓo ɓe n gye oza dnagmayi nu. Har aza 400 ɓa viwo. Amma shi aɓo wuwo owo aviyi ɓa gnami.

37“Elonu Yahuda Galili nya, ngadu sayi, wo ɓo ku aza bwi n mwa. Amma shi wo ɓo fi aza gna mi.

38“Ntu ce nu mi ye fya fa ɓa. Nɓa zhin n ɓahin tukwo nu sa fyewyi ko ɓa ze gboloyi. 39Amma ngye ɓa zhin Shekwoyi nya nu, fye ta mi fya hana ɓai m. Kada fya gye fyei zhin gaba n Shekwoyi.” 40A shaula zhin yi ɓa yi abara ɓa lu ɓa. Ba gna ɓa ge ɓa to je Yesu ɓeda da m. 41Abara kun ɓai dagma gama ɓa ku kunce ɓa sun wahala ntu Yesu ɓo. 42Ɓa gyi abye fyegyi-fyegyi n aduwa nyakun ɓai wu nya ɓai zhin waʼazi ge Yesu nu zhin Kristi.